Drejtori i Përgjithshëm z. Klevis Qose pret ambasdorin e Bullgarisë në Tiranë z. Ivaylo Kirov

Drejtori i Përgjithshëm i Burgjeve, Klevis Qose, priti në një takim ambasadorin e Bullgarisë në Shqipëri, z. Ivaylo Kirov, për të diskutuar mundësitë e bashkëpunimit në fushën e sistemit penitenciar.

Gjatë takimit u trajtuan çështje që lidhen me shkëmbimin e përvojave dhe praktikave më të mira në menaxhimin e institucioneve penitenciare, modernizimin e strukturave, trajnimin e stafit dhe përmirësimin e kushteve për të dënuarit. U theksua rëndësia e një bashkëpunimi të ngushtë ndërinstitucional për të garantuar një sistem penitenciar sa më efikas dhe të përputhur me standardet evropiane.

Ambasadori Kirov shprehu gatishmërinë e palës bullgare për të mbështetur nisma që synojnë përmirësimin e sistemit penitenciar në Shqipëri, përmes ofrimit të ekspertizës dhe mundësive të trajnimit për punonjësit e këtij sektori.

Ky takim shënon një hap të rëndësishëm drejt forcimit të marrëdhënieve mes dy vendeve në këtë fushë dhe krijon mundësi për projekte konkrete bashkëpunimi në të ardhmen.