Ceremonia e vlerësimit, gradime dhe mirënjohje për punonjësit e policisë së burgjeve

Ministri i Drejtësisë, Ulsi Manja, së bashku me Drejtorin e Përgjithshëm të Burgjeve, Klevis Qose, dhe Drejtorin e Policisë së Burgjeve, Paulin Rajta, morën pjesë në një ceremoni të veçantë ku u ndanë gradat dhe certifikatat për punonjësit e sistemit penitenciar. Ky aktivitet shënoi një moment të rëndësishëm për të nderuar punën dhe përkushtimin e qindra punonjësve që kontribuojnë çdo ditë në garantimin e rendit dhe sigurisë në institucionet penitenciare.

Në këtë ceremoni, 88 punonjës të Policisë së Burgjeve u vlerësuan me certifikata mirënjohjeje për kontributin e tyre të spikatur dhe profesionalizmin e treguar gjatë detyrës. Gjithashtu, 22 punonjës që dolën në pension u nderuan për shërbimin dhe dedikimin e tyre ndër vite, duke lënë një shembull të vyer për brezat e ardhshëm.

Një nga momentet më domethënëse të ceremonisë ishte ndarja e gradave. 72 punonjës u graduan në detyrën e Kryeinspektorit, ndërsa 6 të tjerë morën gradat Nënkomisar, Komisar dhe Kryekomisar. Po ashtu, 70 inspektorë të rinj kryen betimin, duke u bërë zyrtarisht pjesë e sistemit penitenciar dhe duke premtuar përkushtim ndaj detyrës dhe zbatimin e standardeve më të larta profesionale.

Gjatë fjalës së tij, Ministri Ulsi Manja vlerësoi punonjësit për sakrificat dhe profesionalizmin e treguar në një sektor që kërkon angazhim të vazhdueshëm dhe shpesh përballet me sfida të vështira. Ai theksoi se puna e tyre është jetike për ndërtimin e një shoqërie më të drejtë dhe humane, duke shtuar se angazhimi i tyre shërben si një model i shkëlqyer për shërbimin publik.

Në përfundim, pjesëmarrësit përcollën urime për festat e fundvitit, duke u uruar punonjësve dhe familjeve të tyre shëndet, gëzim dhe arritje të reja në vitin që po vjen. Ceremonia ishte një dëshmi e rëndësisë së njohjes së kontributit dhe e frymës së bashkëpunimit që karakterizon sistemin penitenciar shqiptar.