Drejtori i Përgjithshëm i Burgjeve, z. Klevis Qose, mirëpret nismën rehabilituese të bazuar në Terapinë Kognitive Biheviorale

Drejtoria e Përgjithshme e Burgjeve, në bashkëpunim me “Institutin Korrektues të Komunitetit Amerikan” dhe “Kongregatën e Misionit të Shën Vinçenc de Paoli”, firmosi Marrëveshjen e Bashkëpunimit për zbatimin e programit “Shkolla – Aftësitë për Jetën” në të gjitha institucionet e ekzekutimit të vendimeve penale në Shqipëri.

Marrëveshja u nënshkrua në prani të Drejtorit të Përgjithshëm të Burgjeve, z. Klevis Qose, si dhe përfaqësuesve të lartë të organizatave partnere, At Luigi Cannato CM dhe At Gjergj Ndreka.

Programi “Shkolla – Aftësitë për Jetën” sjell për herë të parë në mënyrë të strukturuar në nivel kombëtar një qasje të re rehabilituese, e bazuar në Terapinë Kognitive Biheviorale. Qëllimi i tij është ristrukturimi kognitiv dhe ndryshimi i sjelljeve vetëshkatërruese përmes një metodologjie narrative dhe ndërgjegjësimi personal.

Kurrikula e hartuar përfshin pesë module kryesore:

      •     Dhuna në Familje

      •     Dhuna Seksuale

      •     Korrigjimi i Sjelljes

      •     Punësimi

      •     Abuzimi me Substancat

Ky program u pilotua me sukses gjatë vitit të kaluar në katër IEVP, duke regjistruar një rritje prej 145.24% në pjesëmarrjen e të burgosurve dhe një shtim të ndjeshëm të orëve jashtë qelisë. Rezultatet e arritura janë në përputhje me rekomandimet e Komitetit Evropian për Parandalimin e Torturës (CPT).